GO’AANNADA GEESINIMADA LEH EE CALI KHALIIF GALAYDH IYO MADAXDA KHAATUMO WAA DHAMAYSTIRKA SOMALILAND LOO WADA DHAN YAHAY.

0
212

 

Waxa hambalyo, dhiirri-gelin iyo bogaadinba mudan madaxda khaatumo ee uu hoggaaminayo Prof.Cali khaliif Galaydh oo dhowaan qaatay go’aan ku qotoma xil-kasnimo iyo aragti fog, kuwasoo sida ka muuqata qodobbada ay soo bandhigeen, faaiido u ah ummadda xilka u dhiibatay ee Khaatumo iyo guud ahaanba Somaliland oo dhan.

Dadka ku abtirsada Khaatumo oo ka mid ah dadyowgii dhaliyay somalilandta maanta la wada hadhsanayo, ayaa ah kuwo Somaliland ummadda ku dhaqan ay wadaagaan dad, dal, dhaqan, iyo dhiigba. Hase ahaatee muddoba ay kala fogeeysay arrimo siyaasadeed oo aan dan u ahayn labada dhinac midna, inta badanna ay aad u huriyeen ashkhaas aan ahayn labada dhinac midna, dano gaarana ka lahaa colaaddooda, isla markaana sababtay isku dhac lagu waayo muwaadiniin qaali ah labada dhinacba.

Somaliland caddaalad ah, dhammays-tiran oo loo wada dhan yahay waa mid muwaaddin kasta oo Somaliland u dhashay jecel yahay ama ku taamo, waana qodobka gun-dhigga u ah heshiiska taariikhiga ah ee sida fog uga soo baaraan-degeen Madaxda Khaatumo.

 Heshiiskaas oo anigu markaan dersay (intii aan ka akhriyay), u arkay inay yihiin go’aanno Somaliland u wada dan ah, oo aan ku salaysnayn haba- yaraatee sad-bursi loo doonayo dadka ku ab-tirsada Khaatumo, oo weliba  iyadoo xoogag tiro badani rabeen inay dhiciseeyaan, qaar kalena illaa haddaba weli ku foogan yihiin inaanu hirgelin – ay Mudane Prof.Cali Khaliif, madaxdii iyo shacabkii uu hoggaaminayayba si geesinimo leh ugu tallaabsadeen kuna goaansadeen wadajir – isla-markaana Magacii ha raagee Madax-weynihii hore ee Somaliland Mudane Axmed Maxamed Maxamud Siilaanyo isaguna tacab badan geliyay soo af-jaridda nabad waarta oo dhexdeenna ah, iyo in innagoo isku-duuban aynu ka wada badbaadno dabka innagu hareeraysan ee ka holcaya Bariga Afrika.

Xukuumadda cusub ee Somaliland ee  uu hoggaaminayo Madaxweyne Muuse Biixi Cabdi, iyo Muwaadin kasta ama guud ahaanba shacabka Somaliland oo dhan, waxa waajib ku ah, in la maamuuso, oo la isu soo dhoweeyo walaalaha isu boholyoobay, isla markaana loo dedaalo dhammaystirka heshiiskaas muddada ku beegan illaa bisha August ee sannadkan 2018ka oo ah waqtiga ha noolaadee Prof. Cali Khaliif Galaydh xilkiisu Khaatumo kaga eg yahay.

   Wa Billahi Tawfiiq,

Rasheed Ali Meigag Samater

Hoggaamiyaha Jaaliyadda Soomalida W. London.

LEAVE A REPLY

Please enter your comment!
Please enter your name here